Die KERN van die ❤

Die Goue Vroue pak ‘n splinternuwe uitdaging aan.Dis nou,so tussendeur hulle avonture op Rebusfontein en dan is daar boonop die maandkalender waar elkeen foto’s met ‘n storie skryf.Maar hierdie, HIERDIE IS DIE ONTKNOPING VAN ELKEEN SE DIEPSTE HARTSGEHEIME.

Diep in die hart van hierdie geel bladsye versonke lê die geheim opgesluit.

Nie eens onsigbare ink of kodifisering verbloem die geheimenisse nie.  Elke vrou het haar ontblote geheim versigtig uit hierdie boek verwyder…uitgesny!

Met net mooi genoeg provokasie sal elke vrou dalk, ja dalk tóg! een vir een hulle bladsye terugskryf sodat die leser kan agterkhttps://fresh.inlinkz.com/p/567e0dbec3284abbacab09e8d73f276eom HOE en WAT en HOEKOM elkeen in haar eie reg geluk gevind het.

Lees al die Goue Vroue se geheime op
https://fresh.inlinkz.com/p/567e0dbec3284abbacab09e8d73f276e

“For imagination sets the goal picture which our automatic mechanism works on.  We act, or fail to act, not because of will, as is so commonly believed, but because of imagination.” Maxwell Maltz.

Sy hou elkeen om die tafel se gedagtes vir ‘n oomblik gevange.  Haar tegniek, ‘n Knipoog, is genoeg om elke geheim om die beurt te ontwortel.

Tannie Frannie het reeds haar hand gespeel. 

Sy wat Aalsie is het reeds met elkeen van hulle ‘n pad gestap.  Vir haar het alles begin die aand in Madrid.

Die sigeunervrou het haar gefassineer. Skraal, middeljarig met arms oortrek van armbande en goue hoepeloorringe, ‘n ragfyn swart mantiĺla oor haar haardos en kammetjies wat glim in die warm teaterlig.  ‘n Fynbesnaarde waarnemer met charisma.

Die sigeunervrou met haar soel vel en sielvolle swart oë kon tot diep in jou siel sien.  Sy het Aalsie met dringendheid uitgevra oor WAT – of is dit WIE – haar hart op loop sit.

Aalsie het met ‘n haas onherkenbare hees stem haar hartsgeheim met hierdie onheilspellende vrou begin deel.  Hierdie delikate uitlander verstaan in elk geval nie ‘n woord Afrikaans nie.

Sy begin haar vertelling met die eerste dag.  Die dag toe sy aan hom voorgestel is.  Sy vertel van die eerste indruk wat hy op haar gemaak het…’n goeie indruk.  Hy was nie ‘n lang man nie.  Ook nie fors gebou nie.  Hy was kompak – in verhóúding kompak – maar hy het kop en skouers bo almal wat sy op hierdie eerste werksdag ontmoet het uitgetroon.  Hy was ‘n vors!

Sy sterkste aantrekkingskrag was sy stem.  ‘n Sagte, melodieuse maar diep stem.  Wat verder beïndruk het is die wyse waarop hy homself uitgedruk het.  Alles het saam gepraat. Sy oë, sy hande, sy hele liggaam het gevoelvol en dinamies saam gesels.  ‘n Toonbeeld van meelewing.  Animasie.

Hy was die kenmerkende ” officer and gentleman.”

Hy was engels. Dis heelwaarskynlik die rede vir die sagte stemintonasie. Engelse het nog altyd ‘n bekoring vir haar ingehou. Hulle kultuur fokus op galantheid – nie bloot goeie maniere nie.

Daar was die enkele oomblikke wat nét hy haar woordspeling, humor en flitse uit die
verlede begryp het.  Later sou hulle agterkom dis omdat hulle in dieselfde era en in dieselfde area op skool was.  Hy in die engelse hoërskool en sy in die ander een.

Voëls van eenderse vere, kon mens sê.

Sy bloos as sy vertel hoe hy haar ongemak geniet het as sy die teekamer vol mans ingestap het.  Hy het die vermoë gehad om haar geheelbeeld binne sekondes in te neem en dan goedkeurend te knik.  Vir haar was dit ‘n vorm van erkenning.  Daar was niks goedkoops daaraan nie inteendeel; dit het haar oombliklik op haar gemak gestel.  Haar ingetrek in die offisiersgeledere.

Hy was bewus van haar militêre agtergrond.  Een van die min mense wat daarvan geweet het want sy was in die geheime diens.  Nie iets waarmee jy te koop geloop het nie.

Die nodigheid-om-te-weet beginsel was by albei van hulle ingeskerp.  Hulle was diskreet.

Die sigeunervrou hou die katarsis stilswyend dop.  Dis nie meer nodig om hierdie vrou te inspireer nie.  Die woorde wat vir so lank binne gehou is stroom nou spontaan uit.  Die sigeunervrou verstaan nie meer ‘n woord wat Aalsie sê nie, want dié praat nou vlot Afrikaans ( nie dat dit nodig is om ‘n woord te verstaan nie, haar lyf praat akkuraat)..  Die intensheid van haar gelukkige oomblikke kry momentum en toe, toe snik sy.

“En nou?”, wil die waarsêer weet.

“En nou is hy dood.”

Die sigeunerin kyk vir die eerste keer tydens die gesprek na haar kristalring.

“Julle sal mekaar weer eendag raakloop”, sê sy, “en dan mag julle mekaar openlik liefhê.”

Aalsie kyk oorstelp op en voel hoe haar hele wese ontspan.  Sy voel gelukkig.  Gelukkig in die wete dat haar geheim veilig is.  Ekstaties oor hierdie nuwe wending wat sy nooit verwag het nie!

Die twee vroue maak oogkontak – in stille vertroue.  Sonder om ‘n enkele woord te sê deel hulle die kerngedagte…DAAR IS HOOP. Nà die dood is daar hoop.

Terug in die geselskap van haar geesgenote, word sy oorval met vrae…

“Wat het oor jóú lewer geloop?”, wil Virgo-C verbaas weet.  “Dit lyk of jy ‘n vollengte masseersessie gehad het!”

Appeltjie lag, “Nee, dit lyk eerder of sy ‘n geheime bewonderaar raakgeloop het.”

“Waarvoor wag jy, Aalsie? Gaan verf Madrid rooi!”, sê die kunssinnige (en roma ntiese) Seegogga.

“A penny for your thoughts”, prewel Trommeltjie dromerig.

Woordnoot waag dit met, “kom, deel met ons jou binnepretjie.”

En dan las Toortsie aan, “toe nou Aalsie, laat jou liggie skyn!”

Positief ontlont gelukkig die situasie met “stilbly is ook ‘n antwoord.”

‘n Sagte glimlag sprei oor Sonéll se gelaat.  Sy het nou ‘n nuwe idee vir haar volgende boek.

En Una? Una verlang hartstogtelik na die man in die maan.

Tannie Frannie glimlag skalks. “Daar is nie dalk ‘n broodjie in die oond nie?”

Aalsie vang Christa se oog en knipoog. Sy verstaan en stem in om volgende te skryf.

15 thoughts on “Die KERN van die ❤

  1. Toortsie het ‘n foto van ‘n boek met uitgeskeerde blaaie gesien en ons het besluit om nav die woorde wat ons eien ‘n nuwe skryfuitdaging te skep. Ek het toe ‘n boek se blaaie uitgesny en die foto en inleiding geskryf.Die idee is dat elkeen van ons haar bladsy wat sy uitgeskeur het terugskryf sodat almal mekaar se hartsgeheim kan deel.Daar is heelwat ‘clues’ in die teks van die uitgeskeerde boek itv temas.

    Liked by 3 people

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s