Amigurumi: THE MAGIC CIRCLE

Dit begin met ‘n ‘magic circle’ en dan kry jou ontwerp lyf.  Jy kan enigiets skep.  Ek het besluit op Micky Mouse poppies.
Dit was ‘n eindelose plesier.  Deurgaans is daar geïmproviseer.  Sykous as voering om te keer dat die stopwol nie deurdruk nie, kurkproppe om te keer dat die nekke nie slap hang nie, prentjies blaai vir die mooiste ogies…en toe verloor ek hulle toe ek dit vir my kleinkind pos!

Dié VLV-uitdaging is lankal verby maar die Amigurumi Magic Circle het agter gebly.

Ons sit elke week ‘n dag opsy om saam te hekel of te brei – borduur selfs.  Die punt is, ons doen dit sáám.  Saam sit ons om my eetkamertafel en klets en ruil ‘craft’- tegnieke uit.  Pinterest en Youtube help en dan is daar boon-op ‘n rekenaar en drukker/fotostaatopset wat al handig te pas gekom het.  Die tegnologie werk met ywer saam om die denkskrum tot groter prestasies te lei.

Dit ter syde.  Die heel lekkerste van hierdie Amigurumi’s is die gesprekke om die tafel (en natuurlik die kaal koppies koffie – ons koek en tee nie).