Lag my Klaar

Sy leen haar ore gereeld uit vir haar Goue Vroue blog-groepie.  Soveel so dat sy dié Sondagoggend besluit het om haar gehoorstukke uit die skroefblikkie te haal, splinternuwe batterye in te sit en om dit heeldag aan te hou.
Sy wil nie al hoe dower word, gefrustreerd, gespanne of geïsoleer voel nie en veràl wil sy nie in depressie verval nie…en dit alles omdat sy haar gehoorverlies verwaarloos het!
Dis dus te verstane toe sy die oggend by ontbyt aankondig, “Ek kan nou weer hoor!”
Met dié haal sy die twee warm eiers uit die eierkokertjie, gooi dit vinnig in die bord neer en kap met die vrugtemessie op haar eie kneukel.
Haar man giggel elke nou en dan.
“Waaroor lag jy?,” wil sy later ergerlik weet.
“Oor vanoggend.”
“Wat van vanoggend?”
“Onthou jy die eier?”

“Ja?”
“Ja, jy het die eier gemis…jy kon hoor, maar jy kon nie sien nie!”
Hy gooi sy lang arms om haar en nou lag die twee saam!