Wat as…

Wat as daar ‘n groot swart vleuelklavier met geelwit ivoorklawers in my ruim sitkamer op ‘n dieprooi persiese tapyt gestaan het en…

(Foto geleen)

elke keer wat ek op my klavierstoeltjie gaan sit en die bladmusiek oopvou word ek verplaas in die oomblik en tyd?

ek word die komponis wat sy eerste note uitprobeer totdat die melodie lyf kry en refreine opklink in sarsies na mekaar totdat die coda bereik word, die slot?

die kandelaar op die klavier begin flonker sodra dit skemer raak en ek verras luister na Lisa se klavier?

die voetpedale ritmies op en af beweeg terwyl die klavier vrye teuels gee aan die sonata?

die deksel vanself lig sodat elke nooit in die vleuel se binnebuik, wat na vars hout ruik, duidelik sigbaar is. Die klavier se ribbekas van piepkleinklankies tot diep bas heen en weer rimpels maak terwyl die stoeltjie kraak?

die ‘sugar plum fairies’ op maat van Tchaikovsky se ‘komposisie op en af dans in die kandelaar se glans en ‘le petit negro’ van Debussy op die kruise en molle baljaar?

die strykers van Strauss walse se skadu’s reflekteer teen die hoë muur?

die Hongaarse dansers in kleurvolle tradisionele mondering die vertrek vol hop en spring?

die traan oor my Pierrot skildery se wang rol as hy Chopin hoor speel?

Wat as!